ANDECHA ASTUR DE RIBESEYA PIDE OTRA VUELTA, MIDÍES DE RECUPERACIÓN DEL ESPÍRITU POPULAR NA FOLIXA DE LES PIRAGÜES
HAI YA MÁS D’UN AÑU DENDE QUE PRESENTEMOS UNA RIESTRA DE PROPUESTES NA CASA CONCEYU, ENSIN RECIBIR REMPUESTA DEL GOBIERNU
Dende Andecha Astur de Ribeseya queremos asoleyar públicamente l’apuesta d’esta organización por recuperar el calter popular que tenía antañu la folixa de Les Piragües. Dende la llegada del gobiernu de la drecha, fueron desendolcándose delles midíes qu’arramplaron colo pocu que-y quedaba a les piragües de folixa popular que nel so día foi. Andecha Astur ye cosciente de la dificultá, por nun dicir de la imposibilidá que supón recuperar dellos vezos propios a les piragües, pero si se puen sacar alantre delles midíes que redundaríen nun gran benefiu pal conceyu. Los dos pegoyos d’estes propuestes seríen:
1. Creación d’espacios populares de partíos, asociaciones, clubes deportivos ya eso. Anguaño les barres que salen a puya tan reservaes a unos pocos negocios del pueblu qu’además cada añu son menos, quedando les barres nes manes d’auténtiques mafies qu’especulen con estes. Además de la dificultá económica, la censura a la música alternativa termina de facer imposible la xeneración d’espacios propios.
2. Negociaciones coles grandes firmes que reparten publicidá na folixa y algamar que la montera picona, xilecu y collar de flores recuperen el protagonismu qu’anguañu tienen perdíu en favor de los “cowboys del Seya” de los gorros de paya y pañuelu.
Dende Andecha Astur entendemos que la primera propuesta sería de gran beneficiu pal conceyu puestu que sería una gran fuente d’ingresos p’asociaciones de tou tipu que diba redundar na revitalización de la vida social, cultural y deportiva del conceyu’l restu del añu. Proponemos como llugar más afayadizu pa estos nuevos espacios la calle de los Marqueses d’Argüelles, qu’antañu taba reservada pal dispositivu d’emerxencies especial de Les Piragües. La segunda de les midíes, taría encaminada a ser el primer pasu pa “asturianizar” de nuevu la folixa que perdió tolos sos valores en pocos años, con gran parte de culpa de les grandes multinacionales que regalen milenta artículos propagandísticos que desplazaren l’atuendu Seyeru tradicional. Además queremos qu’esta propuesta seya llevada a plenu y que los partíos con representación na casa conceyu tomen posicionamientu al respeutu, puestu qu’esto ya foi propuestu’l 16 de Mayu de 2008 por Andecha Astur de Ribeseya, ensin tener denguna noticia por parte del gobiernu que se diz d’izquierdes y que sigue gobernando coles directrices que dexó la derecha pal pueblu.
Entradas
