ANDECHA ASTUR COL PUEBLU DE CUERRES

ANDECHA ASTUR COL PUEBLU DE CUERRES

ANDECHA ASTUR QUIER DENUNCIAR TAMIÉN LA POSTURA DEL GOBIERNU PSOE-IU, ALLINIÁNDOSE COLA EMPRESA DENUNCIADA Y A LA ESCONTRA DE TOU UN PUEBLU DEL CONCEYU DE RIBESEYA

Andecha Astur de Ribeseya quier unviar públicamente’l so sofitu a l'AA.VV. de Cuerres y tolos vecinos y vecines del pueblu, na so llucha escontra’l cierre del accesu tradicional a la playa d’esta llocalidá ribeseyana. De sobra ye conocíu por tola xente que dalguna vegada s’averó a esta playa de Ribeseya, que'l camín tradicional d’accesu pasa dende hai milenta años pola finca en litixu, titularidá agora de la empresa denunciada por quebrantar en dellos puntos la Llei de Costes, ya’l reglamentu que la desendolca. Además, Andecha Astur quier recordar a la opinión pública que’l máximu responsable de la empresa “Pomaradas del Guadamía” ya foi condergáu nel pasáu por atentar escontra la natura na ribera del ríu Mía na mesma llocalidá de Cuerres, polo qu’entá ye menos comprensible’l fechu de que la Casa Conceyu de Ribeseya anteponga los intereses d’un particular frente a los de la ciudadanía, oponiéndose a los sos ciudadanos pa favorecer unos intereses particulares y faciendo casu omisu a los pidimientos de sofitu llegal que dende l'AA:VV. unviaron a la Casa Conceyu dende l’entamu d’esti procesu. A lo caberu, abúltanos curiosu cuando menos qu’ocurra tou esto nun asuntu onde tien les competencies un conceyal que diz representar les sensibilidaes d’izquierda ya ecoloxistes, que pertenez además a un gobiernu que prometió fomentar la particiapación de la ciudadanía na vida política y que dende llueu, nun tan cumpliendo les sos promeses.

Poro, dende Andecha Astur desiximos una rectificación pública por parte del gobiernu ribeseyanu y qu’esti preste tol sofitu llegal y físicu a esti coleutivu vecinal, nes sos xustes y lóxiques reclamaciones.

PSOE-IU Y PP: FAI LO QUE DIGO Y NON LO QUE YO FAIGO

PSOE-IU Y PP: FAI LO QUE DIGO Y NON LO QUE YO FAIGO

Dende Andecha Astur de Ribeseya queremos dexar costancia del noxu que mos produz el ver a los políticos reise de la xente, ver a quienes hai unos años pidíen soluciones pa la zona rural nel papel de los gobernantes que solu miren pal so embeligu y como los que d’aquella gobernaben, anguañu piden a los nuevos que faigan lo qu’ellos nun ficieron nesos doce años.

Andecha Astur nun pue sinón tar d’alcuerdu cola propuesta que’l PP diz presentar, pero non porque seya o non una propuesta del PP, sinón porque esa ye la solución más razonable y qu’Andecha Astur vien defendiendo dende los años nos que llego’l PP hasta’l reciente comunicáu onde aldericábemos sobre’l destín de la ayuda de Zapatero. Ye como dicimos la única salida razonable pal futuru de les escueles de los nuesos pueblos, patrimoniu coleutivu y que na mayoría de los casos tan cayendo pol abandonu al que tan condergaes dende los tres grandes partíos. Sirva alcordase por exemplu de les Escueles Nueves de Cuerres, onde’l PP qu’agora diz defender lo contrariu, algamó que los vecinos aprobaren en conceyu una venta d’esta Escuela Nueva, con métodos que nos entendemos foron un clarísimu casu de mobbing inmobiliariu: la venta foi consecuencia d’un llargu alderique onde’l PP amenazó direutamente a los vecinos, diciendo que si nun se vendía esti patrimoniu común afayáu en mediu del pueblu, sería destináu como vivienda social, en concretu pa una familia conflictiva de la redolada, arrequexando a quienes pidimos qu’aquella escuela fuera pa usu y disfrute de los vecinos del pueblu. Enriba les perres de la venta enxamás tornaren a Cuerres, solu los gobernantes sabrán onde quedó esi dineru.

Poro, a diferencia de PSOE-IU y PP qu’intercambien ensin ponese colloraos el so papel según ten nel gobiernu o na oposición, Andecha Astur afita’l so compromisu cola zona rural, por ser esta l’arfueyu que caltién la esencia del país. Defendemos, como ye vezu, que nun s’espolie’l patrimoniu coleutivu de los nuesos pueblos, sinón que seya reconvertíu en centros sociales multiusos, alcordies coles necesidaes que los nuesos pueblos tienen. Además, a xuiciu de nueso nun se perdió de nenguna forma la oportunidá de recuperar estos bienes inmuebles. Andecha Astur va a presentar nos prósimos díes, una riestra de propuestes nel rexistru na Casa Conceyu onde encamentamos al gobiernu llocal a qu’apueste polos talleres d’emplegu en delles fases como mediu más afayaízu pa consiguir encadarmar esta rede social nos pueblos, dende la obra civil de recuperación de les escueles hasta la formación de quienes dempués van tener que trabayar nesos futuros centros de día, lludoteques ya eso, colo qu’además d’ufrir nuevos servicios sociales públicos y de calidá, taremos creando emplegu nel conceyu y ensin enzarranos esclusivamente nel turismu.