ANDECHA ASTUR DE RIBESEYA SOFITA LA IDEGA DE CONSTRUYIR EL LLAR DEL XUBILÁU Y LES VIVIENDES SOCIALES NEL SOLAR DE LA PANTERA ROSA

LA CERCANÍA DE LA CASA-CUARTEL NUN PUE SUPONER UN ESCOYU, CUANDO ADEMÁS LO MÁS LÓXICU YE PLANTEGASE LLEVAR EL CUARTEL A LES AFUERES DEL CASCU URBANU

Dende Andecha Astur de Ribeseya queremos asoleyar públicamente’l nuesu sofitu a la idega de llevantar nel solar de la Pantera Rosa un edificiu qu’acueya’l Llar del Xubiláu y una ventena de viviendes sociales. Les dos actuaciones son pernecesaries nel nuesu conceyu debíu a la falta hestórica de viviendes y llocales sociales que carecemos gracies a los sucesivos gobiernos llocales y d’Asturies. Además Andecha Astur quier apostar públicamente una vegada más, por que seya’l cuartel de la Guardia Civil el que desapaeza del centru de la Villa y que nun seya al revés como dalgunos proponen de forma totalmente ilóxica; nun atalantamos como puen proponer llevar los equipamientos sociales a les afueres y dexar la casa-cuartel, que ye “un pelligru” sigún el mesmu PP, en tan privilexáu llugar nel centru de Ribeseya.

Poro, dende Andecha Astur apostamos además porque’l futuru PXOU contemple un nuevu afayamientu nes afueres del cascu urbanu pal cuartel de la Guardia Civil, que posibilite a mediu plazu lliberar los terrenos qu’anguañu ocupa esti inmueble nel centru urbanu pa que puedan reutilizase con otru tipu d’equipamientos más constructivos pal pueblu, como la futura Casa de la Mocedá que los socios de gobiernu prometieren nos sos programes eleutorales como puntu estrella y que nun paez vayan a reallizar y asina fairemos que conste nes alegaciones que vamos presentar al Avance del PXOU de Ribeseya.