ANDECHA ASTUR COLOS PUEBLOS DEL CONCEYU, ESCONTRA LES TASES INXUSTES

Dende AA entendemos que l’actual modelu fiscal heredáu del PP qu’utiliza l’equipu gobiernu nun pue siguir asina, tratando igual a especulaores y a agricultores.

Dende Andecha Astur de Ribeseya, queremos asoleyar públicamente’l nuesu sofitu a les reivindicaciones que faen públiques dellos representantes de los estremaos pueblos del conceyu. Entendemos que l’actual gobiernu, vien furrulando col mesmu réxime fiscal qu’heredó del PP polo que ta engañando a los ciudadanos que confiaron nun xiru a la izquierda. Además, depués la revisión del catastru supunxo la xabaz xubía del recibu a munchos de los pequeños propietarios de finques, destinaes a la tradicional agricultura d’usu domésticu. Ente esti fechu d’especial gravedá y más nestos difíciles momentos pa la economía de la mayoría de les families, pretende ser solucionáu baxando hasta casi eliminar la tasa que s’aplica nestos casos, vendiéndolo como una midía popular pero qu’en realidá a quien más beneficia ye a quienes especulen col suelu puestu que va siguir cobrándose lo mesmo, tantu a les persones que siguen dando-y l’usu tradicional de pequeñu cultivu como a los los qu’especulen col suelu: va cobrase lo mesmo al que tien una güertina, qu’al que costruye una urbanización de xales y saca millones.

Poro, dende Andecha Astur de Ribeseya y como midía braeramente popular, proponemos que se fixe una tasa variable, non en función de la catalogación del suelu que nun tien na que ver cola realidá, sinón que s’afite sigún l’usu del suelu. Pocu o nada gravosu pa quienes caltienen l’usu agrícola del terrén y especialmente gravosu p’aquelles persones que decidan costruyir neses finques, con una tasa variable en función del previsible enriquecimientu n’actuación.