EL DESPILFARRU DE L'AYUDA DE ZAPATERO

OTRA VUELTA MÁS, LLAMENTAMOS LES FORMES D’ACTUACIÓN DEL CONCEYU RIBESEYA, QUE NUN ATIENDE A LES DEMANDES Y NECESIDAES DE LA POBLACIÓN, NIN CUMPLE LES SOS PROMESES

El gobiernu de Ribeseya vien de facer públicu l’anuncia de tres grandes obres nel conceyu a cargu de los fondos qu’apurre’l gobiernu central del estáu a los conceyos, como midía escontra la crisis. Llamentablemente, creemos que dende la Casa Conceyu nun supieron da-y salida de forma correuta , atendiendo a les necesidaes de la población del conceyu ribeseyanu.

• El primer anunciu ye l’ampliación de la Casa Conceyu, obra qu’atalantamos nun ye una prioridá pa dengún de los vecinos d’esti conceyu, a esceición de la clas política, más cuando ente los tres grandes partíos promenten unos y otros proyeutos, ampliaciones, nueves costruiciones....

• El segundu proyeutu asoleyáu, la costruición d’un edificiu de servicios polivalentes na zona de l’Atalaya, ye’l más xuiciosu de tolos propuestos p’Andecha Astur. En cualesquier casu, dende Andecha Astur queremos recordar que’l primer partíu que llevó esta propuesta fuimos precisamente nosotros, pero nun podemos escaecer que diba dientro d’un proyeutu munchu más ambiciosu en cuantes el conteníu, puestu qu’incluyía la Casa de la Mocedá. Nun podemos dexar que s’escaeza qu’esti equipamientu de mocedá foi además una promesa tantu d’IU como del PSOE nes caberes eleiciones llocales y que nun supondría un sobrecostu escesivu, polo que pidimos que se revise esti proyeutu dando-y cabida a la tan esperada Casa de la Mocedá.

• La tercer obra anunciada ye la peatonalización de la Cai del Comerciu. Queremos dexar costancia del mieu que mos produz esta anuncia, puestu que viendo les chambonaes que tantu esti gobiernu, como anteriores d’otru color desendolcaron nes otres calles peatonales ya esistentes na villa de Ribeseya, camentamos qu’esta nueva peatonalización vaya traer más inconvenientes que ventaxes tantu a residentes como comerciantes d’esta cai ribeseyana. Además, dada la población del nucleu urbanu y del conceyu, el tamañu de les vies y los aparcamientos qu’ufren y que van perdese con una nueva peatonalización, nun vemos onde tan los beneficios d’esta actuación que va concentrar tol tráficu nuna sola cai que va ser un nuevu ermu nos meses d’iviernu.

Poro, dende’l conceyu llocal d’Andecha, atalantamos qu’estes obres nin se correspuenden coles necesidaes de Ribeseya, nin cumplen l’oxetivu de lluchar escontra la crisis nel nuesu conceyu:

-A xuiciu de nueso, sería munchu más beneficiosu otru tipu de pequeñes obres nos pueblos del conceyu, como servicios y centros sociales pa la xente d’estos núcleos, recuperando tamién costruciones públiques como escueles, fontes, boleres ya eso.

-Prestaríanos saber como prentenden lluchar escontra la crisis con estes midíes dende’l gobiernu llocal, puestu que nun vemos qu’estes obres vayan crear nuevos puestos de trabayu nel conceyu nin tampocu impidir que se destruyan los ya esistentes y que cuerren peligru ente’l parón del seutor de la costruición, polo que deberíen facese obres que puedan executar les empreses llocales y non, como ye vezu, una UTE d'empreses foriates que nun dexan beneficios al conceyu de Ribeseya.