EN RIBESEYA ATENTAR ESCONTRA LA ÑATURA Y LOS DRECHOS DE LOS VECINOS YE SESENTA VEGAES MÁS BARATU QUE NUN RECOYER LOS ESCREMENTOS DEL PERRU

ANDECHA ASTUR DENUNCIA QUE LA SANCIÓN PREVISTA POR NUN RECOYER LOS ESCREMENTOS DE LA MASCOTA NES RECIÉN APREBAESN ORDENANCES LLOCALES SOBRE TENENCIA D’ANIMALES YE SESENTA VEGAES MAYOR QUE LA SANCIÓN QUE VA RECIBIR “PUMARADAS DEL GUADAMÍA S.L.”

Andecha Astur de Ribeseya quier asoleyar la so incredulidá ente l’anuncia de que la empresa con actividaes illícites “Pomaradas del Guadamía S.L.” va tener que pagar una multa que nin siquiera algamen los doscientos cincuenta euros, ya ensin embargu ta recién aprebada unes ordenances sobre tenencia d’animales onde se prevén sanciones d’hasta quince mil euros por nun recoyer los escrementos del perru o llevalu ensin bozal. Entendemos qu’esta ye la enésima ocurrencia del equipu gobiernu PSOE-IU que sigue al débalu lo mesmu qu’un barcu ensín timón y bona preba del criteriu de xusticia d’esti gobiernu.

Desde Andecha Astur de Ribeseya encamentamos al gobiernu llocal a la ellaboración d’unes ordenances de mediu ambiente, pa lo qu’Andecha Astur va presentar nel rexistru de la Casa Conceyu una propuesta propia, onde entre otres coses se recueyan sanciones exemplares pa casos como’l de la playa de Cuerres. Tamién atalantamos que les sanciones previstes neses ordenances son totalmente desproporcionaes y posiblemente contraries a Drechu, polo que tamién estudiaremos presentar un recursu de reposición escontra’l plenu nel que foron aprebaes.