jueves, 5 de febrero de 2009

ANDECHA ASTUR PIDE DESPLICACIONES URXENTES Y DETALLAES AL EQUIPU GOBIERNU SOBRE LA CONDENA POR DESPIDU IMPROCEDENTE

Posted by Andecha Astur - Ribeseya - On 4:12 0 comentarios

Dende’l conceyu llocal d’Andecha Astur, asistimos ablucaos lo mesmu que’l restu d’habitantes del conceyu de Ribeseya, a esti nuevu insultu a la intelixencia del contribuyente. Enterámonos pola prensa, que la Casa Conceyu va tener que pagar de l’ayalguería pública cerca de 21.000 euros a una trabayadora que l’equipu gobiernu despidió de forma improcedente por puru caprichu. Desgraciadamente, l’equipu gobiernu del PSOE-IU ta confirmando los peores augurios y tan dando-y continuidá a les formes caciquiles del anterior alcalde y qu’ellos prometieron desterrar de la Casa Conceyu. Les declaraciones del Alcalde y del 1er Teniente Alcalde nun solo nun mos tranquilicen sinón que confirmen tolo anterior: Niega qu’esista dengún despidu depués de tener enriba la mesa una sentencia condenatoria firme que declara improcedente’l mesmu, protagoniza la típica engarradiella col PP a mou de cortina de fumu y depués pies en polvorosa, eso si, na so escapada marcha corriendo y a la vegada, pidiendo tranquilidá al contribuyente. Esti casu, el mou d’actuación del equipu gobiernu, despidiendo y contratando al antoxu, faciendo’l ridículu ya arrastrando’l nome de Ribeseya nos tribunales, coles declaraciones ya’l posterior non recursu de la sentencia, confirmanos qu’además de caciques, tamos gobernaos por unos ineutos y unos mentirosos de primer nivel, ensin dengún respetu poles persones y los y les trabayadores.

Ye por eso qu’Andecha Astur de Ribeseya desixe lo que vien darréu:

  1. Desplicaciones urxentes y detallaes sobre’l casu por parte del equipu gobiernu a tolos ribeseyanos.
  2. Depuración de responsabilidaes a tolos niveles. Entendemos qu’actuaciones como estes y 21.000 euros del dineru de Ribeseya son motivu de cese o dimisión pa los cargos políticos responsables d’esti nuevu desastre.

Además, como nun confiamos en que dengún d’estos dos puntos vayan a dase, Andecha Astur va pidir esto mesmu por escritu nel rexistru de la Casa Conceyu, solicitando si ye precisu al dar l’equipu gobiernu da la callada por rempuesta, que se nos permita participar nun plenu pa pidir les desplicaciones oportunes.

0 comentarios: